- El conseyeru Enrique Fernández anuncia nuna visita a la regasificadora d'El Musel el plan, que tien por oxetivu suministrar esti gas anovable a la industria, el tresporte y el sector enerxéticu .

- Integra un total de 19 iniciatives pa instalar una ventena de electrolizadores.

El Principáu, en collaboración con empreses y axentes rexonales, presentó un proyectu énte la manifestación d'interés llanzada pola Dirección Xeneral de Crecimientu (DG Grow) de la Comisión Europea, al traviés de la European Clean H2 Alliance, empobináu a la puesta en marcha d'una rede de electrolizadores pa la producción d'hidróxenu verde y el so suministru a la industria, el tresporte y el sector enerxéticu.

La iniciativa, coordinada pola Fundación Asturiana de la Enerxía (Faen), xunta parte de les idees pescanciaes na Mesa Rexonal del Hidróxenu y quier contribuyir a la descarbonización de la comunidá. D'esta miente, integra 19 proyectos impulsaos por empreses asturianes o con presencia n'Asturies, como Enagás, Naturgy, TSK, Imasa, Grupu Zima, Hunosa, Duro Felguera, Nortegas, Rioglass, Iberdrola y EDP.

El conseyeru d'Industria, Empléu y Promoción Económica, Enrique Fernández, anunciar güei mientres xuna visita a la planta regasificadora d'El Musel, acompañáu pola directora xeneral d'Enerxía, Minería y Reactivación, Belarmina Díaz Aguado Nel actu tamién participaron l'alcaldesa de Xixón, Ana González; Marcelino Oreja, conseyeru delegáu de Enagás, y Claudio Rodríguez, director xeneral d'Infraestructures de la compañía.

Trátase d'un plan de xeneración anovable de parques eólicos terrestres y offshore, plantes fotovoltaiques o miniturbinas hidroeléctriques, con conexón directa a rede p'almacenamientu enerxéticu. A última hora, tien por oxetu instalar un conxuntu de más de 20 electrolizadores que, en total, van sumar casi 395 megavatios (MW) pa la producción d'hidróxenu verde.

La rede propuesta agrúpase nesta primer fase en trés grandes bloques, pero pueden incorporase más actuaciones. El primer bloque ye un conxuntu de electrolizadores conectaos directamente a instalaciones de producción eléctrica anovable, de más de 500 MW de xeneración eléctrica, qu'alimentaríen 10 electrolizadores d'unos 172 MW, pal sector del tresporte o pa la inyección directa a rede.

Un segundu bloque taría constituyíu por una rede d’ electrolizadores que dexaríen ameyorar el funcionamientu de la rede eléctrica rexonal. Trátase d'un conxuntu de 5 electrolizadores que suman una potencia de 205 MW y que, directamente conectaos a la rede eléctrica, podríen destinase a ameyorar la seguridá del suministru rexonal y los servicios apurríos pola rede a los grandes consumidores.

Finalmente, un tercer bloque taría compuestu d'una rede de electrolizadores conectaos a instalaciones industriales intensives n'enerxía. Nesti bloque prevése primeramente la instalación de más de 5 electrolizadores que sumen una potencia de 18 MW.

Esta rede básica de electrolizadores incluyida na manifestación d'interés presentada énte la UE ye la cadarma de la iniciativa Desarrollu d'un ecosistema rexonal de H2 (ReCoDe H2), que promueve la Mesa Rexonal del Hidróxenu d'Asturies, impulsada pola Dirección Xeneral d'Enerxía. L'oxetivu ye llograr en 2030 xuna rede rexonal de electrolizadores que produzan H2 d'orixe anovable, que ponga en valor infraestructures enerxétiques como la planta de gas d'El Musel o los nuedos de transición xusta y qu'ayude a descarbonizar sectores como la industria o'l tresporte pesáu.

Fernández esplicó qu'esti proyectu asitia Asturies nel mapa del hidróxenu d'Europa y pon de manifiestu l'interés y les potencialidaes del Principáu nun ámbitu que, a nivel européu, considérase un vector clave nel procesu de transición ecolóxica.

Al respective de la planta de gas d'El Musel, el conseyeru destacó la importancia de que llograra l'autorización ambiental que, na práctica, supón desbloquiar una infraestructura estratéxica pal Principáu y facilitar la so puesta en marcha.

- Declaraciones consejero de Industria, Empleo y Promoción Económica (Mp3: 3,6 Mb)