• L’itinerariu que xunta la catedral d’Uviéu, el Real Sitiu y Santu Toribiu de Llébana destaca pola riqueza patrimonial, etnográfica y paisaxística
• El Gobiernu del Principáu llanza una aplicación específica con tola información d’utilidá pa completar el percorríu

Los presidentes Adrián Barbón y Miguel Ángel Revilla inauguren la ruta, que se pon en marcha pola mor de la conmemoración de los 1.300 años de la batalla de Cuadonga

Los presidentes del Principáu, Adrián Barbón, y de Cantabria, Miguel Ángel Revilla, inauguraron güei’l Camín de los Santuarios, una ruta nueva inspirada nel percorríu históricu que xunta la catedral d’Uviéu con Cuadonga y Santu Toribiu de Llébana, en Cantabria, trés referentes fundamentales na historia de la monarquía asturiana. L’apertura y promoción d’esti itinerariu enmárcase na celebración de los 1.300 años de la batalla de Cuadonga.

La conseyera de Cultura, Política Llingüística y Turismu, Berta Piñán; el vicepresidente y conseyeru d’Universidaes, Igualdá, Cultura y Deporte de Cantabria, Pablo Zuloaga, y el conseyeru cántabru d’Innovación, Industria, Tresporte y Comerciu, Javier López, xunto a los alcaldes de los conceyos que traviesa la ruta, percorrieron un tramu del Camín de los Santuarios dende la llende ente Asturies y Cantabria hasta Merodio, n’El Valle Baju de Peñamellera, onde participaron nuna visita guiada pol historiador Toño Huerta sobre los finxos arquitectónicos y etnográficos del llugar.

El Camín de los Santuarios constituye un recursu nuevu, llamáu a convertise en referente cultural y turísticu, pa poner en valor los elementos patrimoniales, naturales y etnográficos que s’atopen na ruta a lo llargo de 200 quilómetros. El percorríu dende Llébana a Uviéu va ser un elementu dinamizador pa los once conceyos asturianos que traviesa: El Valle Altu de Peñamellera, El Valle Baxu de Peñamellera, Cabrales, Onís, Cangues d’Onís, Parres, Piloña, Nava, Noreña, Siero y Uviéu.

L’itinerariu reflexa la gran importancia del patrimoniu históricu y cultural del interior de la contornada oriental asturiana, dende los restos prehistóricos hasta los cenobios y ilesies de tipoloxía variada, qu’abarquen el prerrománicu, el románicu, el renacimientu o’l barrocu; ensin escaecer les construcciones civiles, los elementos etnográficos y los espacios de gran valor paisaxísticu integraos na Rede Natura 2000.

El Camín de los Santuarios conviértese na exa d’un paisaxe persingular, llamáu a convertise nuna referencia dientro de los itinerarios culturales europeos. Amás, nel 2023 va celebrase’l setentenu cuartu Añu Xubilar Llebaniegu, cuando va volver abrise la Puerta del Perdón de Santu Toribiu, polo que la ruta va tener un atractivu añadíu. 

Aplicación pa la ruta

La Conseyería de Cultura, Política Llingüística y Turismu impulsó’l desenvolvimientu d’una aplicación sobre’l Camín de los Santuarios, a cargu de la empresa Where is Asturias, y disponible en castellanu, asturianu, inglés y francés. Esta ferramienta fai posible que les persones que pelegrinen dispongan de tola información útil pa facer el percorríu, al traviés de mapes y perfiles off line, guía de conseyos, itinerarios, datos sobre les etapes, distancies y puntos d’interés.

La aplicación facilita tamién l’accesu a la información meteorolóxica en tiempu real y ufierta la posibilidá de crear a lo llargo del percorríu un diariu de ruta con notes de testu, voz, semeyes y videu. Tamién incluye un diccionariu en dellos idiomes con frases habituales traducíes al español pa que se llean y llocuten dende la propia app.