Comisión d’Asistencia Xurídica Gratuita del Principáu d’Asturies

Tipoloxía

Órganu competente pa efectuar la reconocencia del derechu d’asistencia xurídica gratuita.

Funciones

1. Son funciones de la Comisión, nos términos previstos na Llei 1/1996, de 10 de xineru, estes:
a) Reconocer o refugar el derechu a l’asistencia xurídica gratuita, confirmando o modificando, si ye’l casu, los determinos tomaos primero polos colexos profesionales.
b) Revocar el derechu a l’asistencia xurídica gratuita cuando se dean les circunstancies previstes n’artículu 19 de la Llei 1/1996, de 10 de xineru.
c) Efectuar les comprobaciones y recoyer la información qu’a lo llargo de la tramitación de les solicitúes d’asistencia xurídica gratuita abulten necesaries, y pidir de l’Alministración correspondiente la confirmación de la exactitú de los datos apurríos poles persones solicitantes, pa lo que se van poder usar los procedimientos telemáticos de tresmisión de datos, d’alcuerdu colo estipulao na Llei Orgánica 3/2018, de 5 d’avientu, de Protección de Datos Personales y garantía de los derechos dixitales.
d) Adoptar, desque se consulte a los colexos profesionales respectivos, aquelles midíes que dexen conocer, cola periodicidá qu’abulte conveniente, la situación de los espedientes.
e) Recibir y treslladar al Xulgáu o Tribunal correspondiente l’espediente col escritu d’impugnación de les resoluciones que, de manera definitiva, reconozan o denieguen el derechu.
f) Tramitar les comunicaciones relatives a la insostenibilidá de la pretensión presentaes polos abogaos y abogaes.
g) Supervisar les actuaciones de los Servicios d’Orientación Xurídica previstes n’artículu 26 y actuar como órganu de comunicación colos colexos profesionales, cola mira de canalizar les quexes o denuncies formulaes de resultes de les actuaciones rellacionaes colos servicios d’asistencia xurídica gratuita, naquellos casos en qu’eses iniciatives nun se presentaren directamente énte los colexos.
h) Declarar si’l beneficiariu vieno a meyor fortuna cuando se dean les circunstancies previstes n’artículu 36.2 de la Llei 1/1996, de 10 de xineru. La Comisión va poder pidir el sofitu de los Colexos d’Abogaos pa qu’actualicen la información económica que figura n’espediente d’asistencia xurídica gratuita, cola mira de determinar la capacidá económica del beneficiariu del derechu.
i) Cualquier otra función que-y atribuya la normativa reguladora de l’asistencia xurídica gratuita.

Regulación

• Decretu 13/2020, de 7 de mayu, pol que s’aprueba’l Reglamentu d’Asistencia Xurídica Gratuita nel Principáu d’Asturies. Modificáu por Decretu 73/2020, de 15 d’ochobre.
• Resolución de 2 d’avientu del 2020, de la Conseyería de Presidencia, pola que se modifica l’anexu I.B del Reglamentu d’Asistencia Xurídica Gratuita nel Principáu d’Asturies, aprobáu por Decretu 13/2020, de 7 de mayu.
• Resolución pola que se crea la Comisión delegada d’Asistencia Xurídica Gratuita del Principáu d’Asturies (pdf: 303 Kb)

Componentes

1. La Comisión va tar integrada por estos miembros:
a) Un representante de l’Alministración del Principáu d’Asturies designáu ente funcionarios qu’ocupen un puestu de trabayu de Lletráu/ada del Serviciu Xurídicu del Principáu, quien va asumir la Presidencia de la Comisión.
b) Un representante de los Colexos d’Abogaos d’Uviéu y de Xixón, designáu de común alcuerdu polos titulares de los Decanatos d’aquéllos.
c) Un representante de los Colexos de Procuradores d’Uviéu y de Xixón, designáu de común alcuerdu polos titulares de los Decanatos d’aquéllos.
d) Un representante de l’Alministración del Principáu d’Asturies designáu ente funcionarios qu’ocupen un puestu de trabayu perteneciente a cuerpos o escales del grupu A de la Conseyería competente en materia de xusticia, quien va asumir la Secretaría de la Comisión.

2. Cola mira de garantizar la continuidá de los trabayos y el bon funcionamientu de la Comisión, les instituciones encargaes de la designación van nomar, amás, un suplente por cada miembru, incluyíu’l Presidente. Los miembros titulares y suplentes van ser los únicos habilitaos pa participar na Comisión, pudiendo actuar indistintamente.

• Resolución de 13 de payares del 2023, de la Conseyería de Facienda y Fondos Europeos, pola que se cesen y nomen miembros nuevos de la Comisión d’Asistencia Xurídica Gratuita del Principáu d’Asturies.
• Resolución de 26 d’ochobre del 2023, de la Conseyería de Facienda y Fondos Europeos, pola que se cesen y nomen miembros nuevos de la Comisión d’Asistencia Xurídica Gratuita y de la Delegación de la Comisión d’Asistencia Xurídica Gratuita del Principáu d’Asturies.
• Resolución de 15 de xunu del 2023, de la Conseyería de Presidencia, pola que se cesen y nomen miembros nuevos de la Comisión d’Asistencia Xurídica Gratuita del Principáu d’Asturies.
• Resolución de 25 d’abril del 2022, de la Conseyería de Presidencia, pola que se nomen los miembros de la Comisión Delegada d’Asistencia Xurídica Gratuita del Principáu d’Asturies.
• Resolución de 1 d’abril del 2022, de la Conseyería de Presidencia, pola que se cesen y nomen miembros nuevos de la Comisión d’Asistencia Xurídica Gratuita.
• Resolución de 13 de xunu del 2019, de la Conseyería de Presidencia y Participación Ciudadana, pola que se cesen y nomen miembros de la Comisión d’Asistencia Xurídica Gratuita del Principáu d’Asturies.